Ärfoulch af Chaos? – Baaleräien uut Libyen

0

Posted on : 21-02-2011 | By : H1 | In : Uncategorized

Äächte Informationen uut Libyen sunt roar, dät maaste, wät wie tou heeren kriege, sunt Baaleräien – ieuwen dät moaket it läip stuur, ju Loage intouskätsjen.

Al jäärsene, ap n 20. Februoar, roat it Baaleräien, dät Muammar al-Gaddafi uut dät Lound fljuchted is. Jäärsene skäll’t in ju Haudstääd Tripolis un litjere Stääde as Darna un Tobruk läipe Uutnunnersättengen roat häbe. Benghasi skäl sänt jäärsene fon Apstoundiske kontrollierd weese.

Däälich wude bigjuchted, dät n Huus fon ju Regierenge baadent, un dät een Säntroale fon’t stoatelke Wiedkiekjen juust so as n Gjuchtshuus, uurfaalen un plunnerd wuden is. Al-Gaddafi skäl ätter Venezuela fljuchted weese. Dät fermoudede touminst die britiske Buuteminister William Hague.

Is dät aal nu die Wai toun Ärfoulch, wiest uus dät, dät dät Foulk stäärker wuden is? Af wiest uus dät, dät machtjoankske Ljuude do Protäste foar Demokratie foar hiere oaine Interessen eenfach uutnutsje? Wie konnen bloot hoopje, dät dät Foulk, uum Demokratie tou kriegen, touhoopehaalt un naan Buurgerekriech loosbräkt.