Schlagwort-Archiv: arabiske Ruumte

Buutloundske Iengriepe in Libyen

Amerikoanere skjoote fon n Skip uut
Amerikoanere skjoote fon n Skip uut

Alwen Stoaten, deerunner Frankriek, do Fereende Stoaten un dät Fereende Keningriek, häbe mäd militäriske Iengriepe in Libyen bigind.

In Libyen häd ju Regierenge un nu uk ju Opposition Fljoogere tou Ferföigenge – dät Ferbood wäd nit ienheelden. Ju Regierengsarmee häd ap n njuugentiensten Meerte Woongestriche fon Bengasi mäd Pansere un Artillerie biskeeten un uurnoacht bombadierd. Uk uur Stääde, t.B. Misrata, sunt fon ju Regierengsarmee biskeeten wuden.

Ju Regierengsarmee waas al in Bengasi ientroangen, waas oaber bloot oun n Rant ärfoulchriek un kuud dan fon do Apstoundiske apheelden wäide. Deerbie häbe do Apstoundiske fjauer Pansere fon ju Regierengsarmee iennuumen, man uk uut Fersjoon n oainen Kampfljooger ouskeeten.

Do buutloundske Troppen häbe uk al ounfangd, uum Bengasi Fljoogere un Pansere fon Gaddafi sien Armee tou fernäilen.

Gaddafi meend, do hieden neen Gjucht deertou, hie kwad: „Libyen heert uus, nit jou.“ – un dät Libyen fielicht dät libyske Foulk heere kuud, ap düssen Toacht kumt hie nit.

Bahrain – Demonstrante bisätte oainen Tahrir-Plats

Manama – Ätter dän Dood fon twäin Demonstranten in dän Gulfstoat Bahrain roakeden do Protäste fergeene Täisdai ju Haudstääd Manama. Do Demonstranten häbe dän Ploats as Tahirploats, ätter dät ägyptiske Biespil, uumbenaamd. Die Tahirplats waas dät Säntrum fon do Proteste juun dät Mubarak-Regime. Ju New York Times skrift, deer wieren däälich sowät 10.000 Demonstranten.

Bahrain is bloot n Biespil. Dät sjucht heel un aal so uut, as wuden do Revolutionen nit bloot in Tunesien un Ägypten blieuwe. Deer geböärt wät in ju arabisken Ruumte. Ju Froage is bloot, af dät Ärfoulch häd.