Schlagwort-Archiv: Revolution

Misrata bileegerd – Tuurkäi lät een stöänend Skip nit truch

Misrata – noch unner Kontrolle fon do Rebellen – skuul ap n 8. April Stöän truch Lääwerengen mäd Woapen un Ietelsweere fon Bengasi kriege. Man dät Skip wude fon ju turkske Armee apheelden, uumdät do Türken dän Woapenhonnel nit wolle. Jo kwieden, jo wüülen aan Woapenstilstound truchsätte un Demokratie in’t Lound brange, man Rebellen suurgje sik, dät dät aal in Weerhaid tou Gunste fon Gaddafi gungt un kweede, jo wolle deer eerste uur baale, wan Gaddafi ousoaged is.

Libyen: Ras Lanuf wier in Hounde fon ju Regierenge

Ras Lanuf mäd n wichtigen Oulje-Hoawen wude wier in Regierengshounde broacht. Ras Lanuf waas in n Loop fon dän Apstound aaltied läip uumkamped un häd oafter dän Oainer wikseld, foar n poor Deege häbe dät do Apstoundiske moal wier ärooberd, nu wier ju Regierenge.

Hoaftbifeel juun Gaddafi un twäin Fjuunde

Die Internasjonoale Stroafgjuchtshoaf in Den Haag häd ap n 27. Juni 2011 n Hoaftbifeel uutroat juun Muammar al-Gaddafi (libysken Diktator), sin Suun Saif al-Islam al-Gaddafi un sin Swoager Abdullah Senussi, dän Boas fon dän libysken Stilkenen Tjoonst. Jo wäide as fermoudelke Kriechsferbreekere säkt.

Buutloundske Iengriepe in Libyen

Amerikoanere skjoote fon n Skip uut
Amerikoanere skjoote fon n Skip uut

Alwen Stoaten, deerunner Frankriek, do Fereende Stoaten un dät Fereende Keningriek, häbe mäd militäriske Iengriepe in Libyen bigind.

In Libyen häd ju Regierenge un nu uk ju Opposition Fljoogere tou Ferföigenge – dät Ferbood wäd nit ienheelden. Ju Regierengsarmee häd ap n njuugentiensten Meerte Woongestriche fon Bengasi mäd Pansere un Artillerie biskeeten un uurnoacht bombadierd. Uk uur Stääde, t.B. Misrata, sunt fon ju Regierengsarmee biskeeten wuden.

Ju Regierengsarmee waas al in Bengasi ientroangen, waas oaber bloot oun n Rant ärfoulchriek un kuud dan fon do Apstoundiske apheelden wäide. Deerbie häbe do Apstoundiske fjauer Pansere fon ju Regierengsarmee iennuumen, man uk uut Fersjoon n oainen Kampfljooger ouskeeten.

Do buutloundske Troppen häbe uk al ounfangd, uum Bengasi Fljoogere un Pansere fon Gaddafi sien Armee tou fernäilen.

Gaddafi meend, do hieden neen Gjucht deertou, hie kwad: „Libyen heert uus, nit jou.“ – un dät Libyen fielicht dät libyske Foulk heere kuud, ap düssen Toacht kumt hie nit.

Woapenstilstound een Löägense – Oungriepe ap Apstoundiske gunge fääre.

Gaddafi häd lain: Dät rakt naan Woapenstilstound. Gaddafi-sien Armee gript fääre do Apstoundiske oun, it skäl sogoar al Kampe in Bengasi reeke, dät tou nu tou aaltied n wichtigen Stöän fon dän Apstound waas. Dät sjucht also nit goud uut foar ju Revolution.

Fluuchferboods-Soone un Woapenstilstound in Libyen

Die Seekergaidsräid fon do Fereende Nationen häd ap n soogentiensten Meerte bisleeten, dät dät een Fluuchferboods-Soone uur Libyen reeke skäl.

Die Foarsleek deerfoar koom fon dän Libanon, Frankriek un dät Fereenigede Keningriek.

Libyen reagierde ap ju Mäitnoame mäd Woapenstilstound.

Näis uut Libyen fon n säkstiensten Meerte

Sänt ju lääste Mäldenge häd in Libyen neen Siede groote Ärfoulge häiwed: Bisunners in Az-Zawiyya un Ras Lanuf geen dät loange Tied wai un wier.

Nu, ap n 16. Meerte, tällde aan Suun fon Gaddafi foaruut, die Apstound skuul binne twäin Deege deelsloain wäide. Gaddafi säärm kwad deertou, uk wan dät Buutlound sik ienmiskje wüül, hie kuud uk Frankriek, Amerikoa un Grootbritanien bisiegje.

Ountouniemen is, dät Gaddafi juust so goud as Frankriek, Amerikoa un Grotbritanien weet, dät hie do nit wuddelk bisiegje kon, man mäd düsse Trouenge wol hie wäil in Weerhaid woarskauje, dät düssen muugelken Kriech, wan hie bigind, blouderch wäd, un dät Gaddafi, wan hie uk stierwe mout, so fuul Fäinde as muugelk mee in’t Grääf riete wol. Sukke Seeken häd hie je al oafter kweeden un hoopet, deermäd do Buutloundere uut Libyen ruut hoolde tou konnen, wät bit däälich goud funktionierd häd.

Fääre is tou kweeden, dät ju Armee fonne Regierenge in eenige Stääde läip tousloain häd – nit aaltied kuuden sik do Apstoundiske ärfoulchriek tou Weer sätte.

Näis uut Libyen fon n tjaanden Meerte

Ras Lanuf wäd fääre bombadierd, Az-Zawiyya is fon ju Regierenge tourääch ärooberd wuden. Die Ferdäägengsminister Abu Bakr Younis un die loangjierige Geheemtjoonst-Boas Mustafa al-Kharoubi duuren sänt jäärsene hiere Huuse nit moor ferläite, deeruum dät jo wät juun Gaddafi sien Militär-Aktionen kweeden häbe.

Frankriek häd dän oppositionellen Nationoalräid, die sik as Uurgongsregierenge sjucht, däälich as eensige legitime Fertreedenge fon’t libyske Foulk ounärkoand. Frankriek is die fäärme europäiske Stoat, die dät so sjucht.

Näis uut Libyen fon n 7. Meerte

Libyen, ap n 7. Meerte 2011:

Ras Lanuf, wier do Apstoundiske al jäärsene n Bombenfljooger ouskeeten häbe, wude däälich wier bombadierd. Ju Regierenge kwä, ju hiede in düsse Stääd ju Macht uurnuumen, man dät is een Löägense, ju fermoudelk deertou tjoont, uum ju Bifoulkenge ap ju Regierengssiede tou hoolden. In Weerhaid hoolde do Apstoundiske noch ju Macht in Ras Lanuf. Fuul Ienwoonere sunt oaber al uut Nood foar do Bomben fljuchted.

Ben Dschawad wude fon Regierengssuldoaten tourääch-ärooberd.

Dät rakt Fermoudengen, dät do USA mäd n Apkloorengsfljooger mäd Radar sänt moorere Deege ju libyske Luchtruumte uurkiekje. Fääre wäd däin häbe jo noch nit.

Libyen: Noch aaltied neen Beeterenge tou sjoon.

Ju Regierenge häd Deele fon Az-Zawiyya ärooberd, man die Kääden fon ju Stääd is noch in ju Hounde fon do Apstoundiske.

Ap n füüften Meerte waas ju eerste Mäitenge fon dän oppositionellen Nationoalräid in Bengasi. Juust oun düssen Dai bigonnen wier Luftoungriepe in dät Aaste fon Libyen. Ap n säksten Meerte is bie Ras Lanuf n regierengstjouen Bombenfjooger truch do Apstoundiske ouskeeten wuden, wierbie bee Monskupsmeegliedere stuurwen sunt. As britiske Geheemtjoonstmeegliedere un Suldoaten mäd do Apstoundiske in Bengasi baale wüülen, sunt jo foar kuute Tied fäästnuumen wuden, man jo doarsten ätters dät Lound daach mäd hiere Skip wier ferläite. Uum Ben Dschawad wäd ätter do lääste Mäldengen noch läip kamped.

Näis uut Libyen: Az-Zawiyya is läip uumkamped

In Libyen is so moonich een Stääd in ju Hounde fon ju Regierenge un so moonich een in ju Hounde fon do Apstoundiske. Az-Zawiyya, een Stääd füüftich Kilomeetere wääge fon Tripolis, waas twisketruch wier in Regierengshounde un wude däälich (ap n füüften Meerte) fon Apstoundiske tourääch är’ooberd. Ättermiddeges wude mälded, dät Troppen fon ju Regierenge mäd 35 Pansere ätter Az-Zawiyya wai fiere. Fon ju Slacht is noch niks bikoand.

Libyen: Fljoogere ful mäd Lieken – man uk ju Opposition wäd stäärker

Jäärsene, ap n 24. Februoar 2011, roate dät Bigjuchte, dät heele Fljoogere mäd Lieken bileeden wäide, do in Wüüstengestriche broacht wäide. Moorere Stääde sunt al uurnuumen fon Apstoundiske. Uum az-Zawiya wude noch läip kamped. In Tripolis is jäärsene min geböärt, deeruum dät deer dät maaste Gaddafi-tjoue Militär seet. Un Gaddafi bitoalt Suldoaten uut Kenia, Mali, Niger un dän Tschad, do in’t foaren oarbaidsloos wierene, deermäd jo do Demonstranten uumebrange. Man touminst wuden Gaddafi-sien un wäkke uur Konten fon libyske Politikere un hiere Familien in ju Swaits speerd.

Däälich, ap n 25. Februoar, skäl n Marsk fon do Millionen ätter Tripolis wai gunge. Wier häbe sik wäkke Suldoaten, sogoar in n Stääddeel fon Tripolis, oun ju Opposition ounsleeten. Uk do Suldoaten, do dän Internationoalen Lufthoawen Mitiga tichte bie Tripolis bisät hieden, moakje nu bie dän Apstound mee. Wäägen dän Marsk rakt dät in do uumelääsende Steeden al Kampe. Middeges bigon uk dät Skjooten in’t Säntrum fon Tripolis. Ap älkunaan, die ap ju Sträite is, wäd skeeten.

Me skuul oaber nit ferjeete, dät ju Opposition nu uk Suldoaten häd, do touminst do bifräide Gestriche biwoakje – een militäriske Bifräiengsaktion is hoast noch nit bikoand, wan uk ju Opposition per SMS toun Marsk fon do Millionen apruup, un kwad : „Läited uus düssen Fräindai toun Fräindai fon ju Bifräienge moakje.“

Ärfoulch af Chaos? – Baaleräien uut Libyen

Äächte Informationen uut Libyen sunt roar, dät maaste, wät wie tou heeren kriege, sunt Baaleräien – ieuwen dät moaket it läip stuur, ju Loage intouskätsjen.

Al jäärsene, ap n 20. Februoar, roat it Baaleräien, dät Muammar al-Gaddafi uut dät Lound fljuchted is. Jäärsene skäll’t in ju Haudstääd Tripolis un litjere Stääde as Darna un Tobruk läipe Uutnunnersättengen roat häbe. Benghasi skäl sänt jäärsene fon Apstoundiske kontrollierd weese.

Däälich wude bigjuchted, dät n Huus fon ju Regierenge baadent, un dät een Säntroale fon’t stoatelke Wiedkiekjen juust so as n Gjuchtshuus, uurfaalen un plunnerd wuden is. Al-Gaddafi skäl ätter Venezuela fljuchted weese. Dät fermoudede touminst die britiske Buuteminister William Hague.

Is dät aal nu die Wai toun Ärfoulch, wiest uus dät, dät dät Foulk stäärker wuden is? Af wiest uus dät, dät machtjoankske Ljuude do Protäste foar Demokratie foar hiere oaine Interessen eenfach uutnutsje? Wie konnen bloot hoopje, dät dät Foulk, uum Demokratie tou kriegen, touhoopehaalt un naan Buurgerekriech loosbräkt.

Mubarak häd sien Amt deellaid!

Näis uut Ägypten: Ätter do loange Proteste juun ju ägyptiske Regierenge häd Husni Mubarak ap n 12. Februoar 2011 sien Amt as Präsidänt, dät hie al sänt 1981 hiede, deellaid. Dät kwad Vizepräsidänt Omar Suleiman ap n Fräindai, n 11. Februoar  in’t stoatelke Wiedkiekjen. Hie kwad uk, dät Mubarak dät Militär ju Apgoawe roat häd, ju Macht tou uurniemen.

Deertou lät sik kweede, dät dät Militär ju Macht al häd. Dät Militär stoant (touminst noch apstuuns, af dät so blift, wol ju Toukumst wiese) ap ju Siede fon do Demonstranten. Dät waas deertruch muugelk, dät dät Militär aal ju Tied täämelk uunouhongsk fon ju Regierenge waas (so tou kweeden n Stoat in n Stoat).  So kuude sik dät Militär skutsend foar do Demonstranten staale un waas neen Woape in ju Hounde fon dän Diktator.

Nu blift tou hoopjen, dät die Militär-Räid, die hoast ju Macht in Ägypten häd, dät Lound uk in ju Demokratie fiert insteede fon een näie Diktatuur aptougjuchten.

Touminst do Ägyptere skiene optimistisk tou weesen: Jo skällen ätter wäkke Bigjuchte in Bliedskup bruurelk mäd do Suldoaten truch do Sträiten luuke.